Friday, August 31, 2007

သင်းဖွဲ့စိတ်ဓာ


အိုင်တီခေတ် KNOWLEDGE လုပ်သားနဲ့ သင်းဖွဲ့စိတ်ဓာတ်

ကွန်ပျူတာနည်းပညာ တိုးတက်ဖွံ့ဖြိုးမှုနဲ့အတူ ဆော့ဖ်ဝဲ တီထွင်ရေးသားမှု (software development) လုပ်ငန်းဟာလည်း ကမ္ဘာနဲ့အဝန်း တိုးတက်ဖွံ့ဖြိုးလာခဲ့ပါတယ်။ ဒီလုပ်ငန်းဟာ ငွေကြေးဓနအင်အားကြွယ်ဝမှုထက် လူသားတို့ရဲ့အသိဉာဏ်ပညာ (knowledge) ကိုအခြေပြုတဲ့ လုပ်ငန်းဖြစ်တာကြောင့် ဖွံ့ဖြိုးဆဲနိုင်ငံတွေအတွက်ပါ ရေရှည်မှာအားထားရမယ့် လုပ်ငန်းအမျိုးအစားတစ်ခုပါ။ တစ်နည်းပြောရရင် လူသားအရင်းအမြစ် (human resources) ကို ပဓာနပြုတဲ့လုပ်ငန်းဖြစ်တာကြောင့် လူသားတွေရဲ့ အရည်အသွေးမြင့်ရင် မြင့်သလောက် နိုင်ငံဖွံ့ဖြိုးအောင်လုပ်နိုင်တဲ့ လုပ်ငန်းပဲဖြစ်ပါတယ်။

ဒါဆိုရင် လူတွေရှိရုံနဲ့ ပြီးရောလား၊ နောလစ်ခ်ျလုပ်သား (knowledge worker) တွေ များပြားရုံနဲ့ ရရောလားဆိုတော့လည်း မဟုတ်သေးပါဘူး။ ဘယ်စက်မှုလက်မှုလုပ်ငန်းမျိုးအတွက်မဆို မရှိမဖြစ်လိုအပ်တဲ့ အခြေခံအဆောက်အအုံ (infrastructure) ကိုတော့ အတိုင်းအတာတစ်ခုအထိ ပြည့်စုံအောင် ဖြည့်ဆည်းပေးရမှာပါ။ ဆော့ဖ်ဝဲ ရေးသားတီထွင်ထုတ်လုပ်ရာမှာ ဖွံ့ဖြိုးပြီးနိုင်ငံကြီးတွေက နောလစ်ခ်ျလုပ်သား (ဝါ) ဆော့ဖ်ဝဲဒီဗလော့ပါတွေရဲ့လုပ်ခလစာဟာ ဖွံ့ဖြိုးဆဲနိုင်ငံတွေမှာထက် အဆတစ်ရာဝန်းကျင် ကြီးမြင့်နေပါတယ်။ ဒါကြောင့် ဆော့ဖ်ဝဲကုမ္ပဏီကြီးတွေဟာ သူတို့ နိုင်ငံပြင်ပရှိ ဖွံ့ဖြိုးဆဲနိုင်ငံတွေကပရိုဂရမ်မာတွေဆီ လုပ်ခဈေးချိုချိုနဲ့ အပ်နှံလာကြပါပြီ။

ဒီလိုဖွံ့ဖြိုးပြီး စက်မှုနိုင်ငံကြီးတွေရဲ့ ပြည်ပမှအရင်းအမြစ်ရယူမှု (out-sourcing) ကြောင့် ဖွံ့ဖြိုးဆဲနိုင်ငံတွေက အိုင်တီပညာရှင်လုပ်သားတွေအဖို့လည်း စို့စို့ပို့ပို့ဝင်ငွေရနေကြပါပြီ။ ကျွန်တော်တို့နဲ့ အိမ်နီးချင်းနိုင်ငံတွေထဲမှာဆိုရင် အိန္ဒိယဟာ ဆော့ဖ်ဝဲရေးသားတီထွင်မှုမှာ ထိပ်တန်းရောက်နေပြီး အိုင်တီပညာရှင်တွေဟာ မိမိနိုင်ငံအတွက် အဓိကနိုင်ငံခြားဝင်ငွေ ရှာဖွေပေးနိုင်သူများတောင် ဖြစ်လာကြပါပြီ။

ကျွန်တော်တို့မြန်မာနိုင်ငံမှာလည်း ပြည်ပဆော့ဖ်ဝဲဟောက်စ်တချို့ကအပ်နှံတဲ့ အသုံးချဆော့ဖ်ဝဲတွေကို မော်ဂျူးအလိုက် လက်ခံရေးသားမှုတွေ ရှိနေပါပြီ။ ဖွံ့ဖြိုးဆဲနိုင်ငံအဖြစ် တည်ဆောက်ဆဲကာလဖြစ်တဲ့အလျောက် အခြေခံအဆောက်အအုံ မပြည့်စုံမှု၊ အရည်အသွေးပြည့် နောလစ်ခ်ျလုပ်သား နည်းပါးနေမှုတွေကြောင့် လတ်တလောကာလမှာ ဒီလုပ်ငန်းဟာ မတွင်ကျယ်လှသေးပါဘူး။ ဒါပေမဲ့ မွေးရာပါဗီဇအရ ကြောင်းကျိုးဆက်စပ်တွေးခေါ်တတ်မှုစွမ်းရည်မှာ အိမ်နီးချင်းနိုင်ငံသားတွေထက် နည်းနည်းမှမလျော့တဲ့ မြန်မာတို့အဖို့ ဆော့ဖ်ဝဲတီထွင်ရေးသားမှုလုပ်ငန်းဟာ အနာဂတ်မှာ အဓိကပင်မ နိုင်ငံခြားဝင်ငွေရှာဖွေပေးတဲ့ လုပ်ငန်းတစ်ခု ဖြစ်လာမှာသေချာပါတယ်။

ဒီနေရာမှာ သတိပြုစရာတစ်ခုပဲရှိပါတယ်။ အဲဒါကတော့ သင်းဖွဲ့စိတ်ဓာတ်(team spirit) ရှိဖို့ပါပဲ။ ဆော့ဖ်ဝဲလုပ်ငန်းဟာ 'ကြောင်းကျိုးဆက်စပ်တွေးခေါ်မှုနဲ့ မိနစ်မခြား တရစပ်တိုးတက်ပြောင်းလဲနေတဲ့ အိုင်တီနည်းပညာ ဗဟုသုတကြွယ်ဝမှုတို့အပေါ်မှာ အဓိကအားထားကြရတာပါ။ ဒီလိုအရည်အသွေးတွေနဲ့ ပြည့်စုံဖို့ဆိုရင် တစ်ဦးကောင်းတစ်ယောက်ကောင်း လုပ်လို့မရပါဘူး။ တွေးခေါ်ကြံဆလို့ရထားတာတွေ၊ လေ့လာမှတ်သားထားတာတွေကို အပြန်အလှန်မျှဝေမှု (share) လုပ်ကြဖို့ အလွန်အရေးကြီးပါတယ်။ ဆော့ဖ်ဝဲဟောက်စ်တစ်ခုမှာ လူတစ်ယောက်စ၊ နှစ်ယောက်စက အရမ်းတော်နေရုံနဲ့ ဘယ်လိုမှမအောင်မြင်နိုင်ပါဘူး။ ပြည့်စုံပြီး အဆင့်မြင့်တဲ့ဆော့ဖ်ဝဲတွေ တီထွင်ရေးသားပေးနိုင်ဖို့ဆိုရင် စနစ်သရုပ်ခွဲသူ၊ ဒီဇိုင်းရေးဆွဲသူတို့ကအစ ပရိုဂရမ်မာတွေအလယ် အရည်အသွေးစစ်ဆေးထိန်းချုပ်ရေး (quality control) လုပ်သူများအဆုံး အားလုံးဟာ အရည်အသွေးပြည့်ဝနေဖို့လိုပါတယ်။ ဒီလို ပြည့်ဝဖို့အတွက် တစ်ဦးနဲ့တစ်ဦးအကြား ကိုယ်သိထား၊ တတ်ထားတာတွေကို အပြန်အလှန်ဖလှယ်တဲ့ အလေ့အထရှိဖို့ အလွန်အရေးကြီးပါတယ်။

မိမိတစ်ဦးတည်း တော်နေ၊ ချွန်နေ၊ တတ်နေရုံနဲ့ ဆော့ဖ်ဝဲကောင်းးတစ်ခု ထွက်ပေါ်မလာနိုင်ဘူး။ မိမိအပါအဝင် ဆော့ဖ်ဝဲဟောက်စ်တစ်ခုလုံး ထူးချွန်ထက်မြက်နေမှသာ ဆော့ဖ်ဝဲကောင်းတွေ တီထွင်ရေးသား ထုတ်လုပ်နိုင်မှာဖြစ်တယ်။ ဒါကြောင့် မိမိတတ်မြောက်ကျွမ်းကျင်သမျှကို မိမိနဲ့ လုပ်ဖော်ကိုင်ဖက်အားလုံးဆီ မထိန်မချန်ဘဲ ဝေမျှပေးသွားရမယ်ဆိုတဲ့ စိတ်ဓာတ်မျိုးရှိနေကြဖို့ လိုပါတယ်။

တစ်ဖက်မှာလည်း ကိုယ်တိုင်တော့ အားစိုက်တွေးခေါ်ကြံဆမှု၊ လေ့လာဆည်းပူးမှုမလုပ်ဘဲ သူတစ်ပါးဆီကချည်း ရသမျှခူးပြီး၊ ခပ်ပြီးသားအသင့်ယူစားတတ်တဲ့ ဓလေ့စရိုက်မျိုးမရှိဖို့လည်း လိုပါတယ်။ သူများလေ့လာထားသမျှကိုသာ အဆင်သင့်ရယူတတ်တဲ့သူတွေချည်း များနေပြန်ရင်လည်း အဲဒီဆော့ဖ်ဝဲဟောက်စ်မှာ ဘယ်သူမှအပင်ပန်းခံ ကြံဆ၊ လေ့လာဆည်းပူးမှုတွေ လုပ်ကြတော့မှာမဟုတ်ပါဘူး။ ဒါကြောင့် ဒီလုပ်ငန်းမှာ သင်းဖွဲ့စိတ်ဓာတ်ရှိကြဖို့ အလွန်အရေးကြီးပါတယ်။ တစ်ဦးကောင်း၊ တစ်ယောက်ကောင်းကြိုးစားပြီး တတ်ထား၊ သိထားသမျှ ချိုထား၊ ဝှက်ထားတတ်သူတွေရော၊ ရေသာခိုအချောင်လိုက်တတ်သူတွေပါ မရှိပါမှ အောင်မြင်တဲ့ ဆော့ဖ်ဝဲဟောက်စ်တစ်ခုဖြစ်လာမှာပါ။

မကြာတော့တဲ့ အနာဂတ်ကာလတစ်ခုမှာ ကျွန်တော်တို့ မြန်မာနိုင်ငံသားလူငယ်တွေဆီကို ဆော့ဖ်ဝဲတီထွင်ရေးသား ထုတ်လုပ်ရေးလုပ်ငန်းဆိုတဲ့ 'အခွင့်အလမ်းကောင်း' တစ်ခု ရောက်လာတော့မှာပါ။ အဲဒီအခွင့်အလမ်းကောင်းကို မြန်မာလူငယ် နောလစ်ခ်ျလုပ်သားများအနေနဲ့ အမိအရဆုပ်ကိုင်နိုင်ဖို့အတွက် မရှိမဖြစ် လေ့ကျင့်ပျိုးထောင်ထားရမှာကတော့ 'သင်းဖွဲ့စိတ်ဓာတ်' သာလျှင်ဖြစ်ပါကြောင်း တင်ပြလိုက်ရပါတယ်။

No comments: